Xəbər verdiyimiz kimi, ötən gün Türkiyənin “Məmləkət” partiyasının sədri Məhərrəm İncə prezidentliyə namizədlikdən imtina edib.
Tacxeber.com xəbər verir ki, onun namizədlikdən çəkilməsi ilə bağlı çıxışının videosu bədən dili mütəxəssisi tərəfindən analiz edilib.
Türkiyəli yazar və davranış elmləri mütəxəssisi Aşkım Kapışmak deyib ki, M.İncənin son çıxışındakı üz ifadələri, əl hərəkəti və s. onun gərgin və əsəbi olduğunu göstərir.
“Çıxışı zamanı dodaq kənarlarının aşağıda olması, kədər, üzüntü mənasına gəlir. Bundan əlavə, o danışarkən boğazında damarlar kəskin bilinir, üzü qızarıb. Bu da o deməkdir ki, siyasətçi güclü stres keçirir.
Eyni zamanda çıxış edərkən üzündə iki mikro ifadə diqqət çəkir. İçəri çəkilən dodaqlar əsəbi, dodağın bir tərəfinin yuxarı qalxması alçaltma duyğusunu ifadə edir.
Ümumi olaraq dəyərləndirsək, sizin də təxmin edəcəyiniz kimi, Məhərrəm İncənin burada böyük gərginlik yaşadığını, əsəbi və kədər içərisində olduğunu deyə bilərik”.