Bakıda yaşlı qadının iki nəfər tərəfindən işgəncəyə məruz qalması ilə bağlı görüntülər yayılıb.

Hadisə Xəzər rayonu, “Albalılıq” yaşayış massivi, Nəriman Əliyev küçəsindəki evlərdən birində baş verib.Videogörüntüdəki yaşlı qadının oğlu Əkrəm Abbasov Xezerxeber-ə açıqlamasında bildirib ki, 3 il öncə anasının belində problem əmələ gəlib və bundan sonra gəzməyində çətinlik yaranıb. Anasına illərdir özü və həyat yoldaşı baxıb. Bu görüntülərin ortaya çıxmasına isə həyat yoldaşı ilə bacısı arasındakı problem səbəb olub.Əkrəm Abbasovun sözlərinə görə, görüntünü həyat yoldaşı Kəmalə Abbasova 7 ay öncə lentə alıb və bacısına göndərib. Məqsədi baldızına anasının evin işlərində problem yaratdığını göstərmək olub. Bununla belə, Əkrəm Abbasov anasına zorakılıq göstərilməsi iddialarını təkzib edib. Qeyd edək ki, Əkrəm Abbasov yaşlı anasını sentyabrın 4-də Naxcıvan Muxtar Respublikasının Sədərək rayonuna bacısının yanına aparıb və hazırda da qadın qızının yanındadır.